مفاهيم خاطئة عن طب العيون

دايما الإشاعات أو الخرافات بتبتدي إن في حد بيصدق كلام إتقال قدامه و بيبتدي ينشره وسط الناس من غير حتي ما يتأكد من صحته و نفس الكلام هنا في العيون و طب العيون يعني زمان الأمهات كانوا بيقولولنا متناموش و إنتوا لابسين شرابات عشان دا غلط علي عينكوا 😀 و مش بس كدا لا في حاجات تانية كتير زي الجزر بيقوي النظر مثلا وطبيعى تتنقل المفاهيم دي من جيل لجيل.والمفاهيم الخاطئة هنا مش هاتبقي عن العمليات أو طب العيون بشكل عام لكن هانتكلم عن مفاهيم خاطئة في الأكل مرتبطة بالعيون . و من هنا حاولنا نجمعلكوا حاجات كتير مغلوطة عن العيون و طب العيون.

1.الجزر بيقوي النظر

“الجزر بيقوي النظر” بدأت الخرافة أو الأسطورة دي في الحرب العالمية التانية و دا لإن كان في نقص في أنواع الأكل اللي بتتقدم في الوقت دا لكن كان في وفرة كبيرة جدا من الجزر و ساعتها السلاح الجوي الملكي البريطاني طلع بفتوي إن الجزر بيساعد في إنك تقدر تشوف عدوك في الضلمة أكتر و بدأت تنتشر الشائعة دي و كل دا عشان الجنود ياكلوا الجزر و ميعترضوش عليه و لحد دلوقتي الشائعة دي موجودة هى صحيح فعلا كانت اشاعة بس مش كلها غلط .وده لإن لمفيش أغذية بتقوي النظر بس يعني مثلا  ليه الجزر مفيد جدا للعين وبيقوي النظر ؟ عشان هو بيحتوي علي مادة الكاروتين و فيتامين (أ) . المختصة بالخلايا الصبغية البادئة ولكن الجزر مش بيغذي العين بس و باقي الجسم لأ لكن التمثيل الغذائي بيوزع الغذاء و الفوائد علي باقي الجسم. عشان كدا أهم حاجة إنك تمشي علي نظام غذائي متكامل يمد الجسم بكل إحتياجاته.
و الكاروتين: هو عبارة عن مجموعة ضخمة و متنوعة من الفحوم الهيدروجينية بينتجها النباتات بشكل خاص المخروطيات  و صبغة بناء ضوئي ليها لون برتقالي و هو اللي بيدي الجزر اللون بتاعه.وهي أجسام مانعة للأكسدة و بتستخدم عشن تخلص الجسم من الزيادة اللي ممكن تسبب ضرر من الجذور الحرة في الجسم. طب إيه هي أهم الفيتامينات اللازمة للجسم وبتساعد في عملية الإبصار و أهم طرق النظام الغذائي و أسلوب حياه نقدر نستخدمه و نطبقه عشان صحة و نظر أفضل

2.نضارة حفظ النظر

و دا إعتقاد عند المصريين إن نضارات حفظ النظر بتحمي النظر من الإصابة بطول النظر أو بقصره و لكن الإعتقاد دا غير علمي بالمرة و النضارات هي عدسة و ظيفتها تكوين بؤر الصورة مباشرة علي القرنية و مش لإيقاف النظر او لطول النظر.

3.المياه البيضاء

في إعتقاد عند المصريين إن لازم تسيب المياه البيضاء لحد ما تستوي أو لحد ما ينعدم البصر و بعد كدا تشيلها و دا إعتقاد خاطيء غير مبني علي دلالات علمية و بالعكس دا بيسبب مخاطر علي العين ،المياه البيضاء (إعتام عدسة العين) و هو مرض ليه أسامي كتير منها الساد و الكتاراكت و إعتام عدسة العين و  بيصيب عدسة العين الطبيعية القائمة خلف الحدقة،  فيعتمها و يفقدها الشفافية و دا بيسبب ضعف البصر او فقده تماما. و مرض الساد مسئول عن 50% من حالات العمي. و الساد بيحصل بسبب تقدم العُمر أو بسبب التعرض لصدمة. و علاجه بيحصل عن طريق التدخل الجراحي فقط.

4.ضغط الدم و ضغط العين ليهم علاقة ببعض

و أحد المفاهيم الخاطئة عند كتيير من الناس إن ضغط الدم و ضغط العين مرتبطين ببعض و دا إعتقاد خاطيء تماما خصوصا إن ضغط العين ليه علاقة بالسوائل اللي موجودة في العين لكن ضغط الدم هو الضغط الموجود في شرايين الدم و عشان كدا الإتنين مختلفين و ملهمش علاقة ببعض بمعني إن كل واحد فيهم مستقل و محدش فيهم بيأثر علي التاني.لكن ضغط العين هو عامل أساسي في الإصابة بالجلوكوما و إنخفاض ضغط الدم ممكن يتسبب في الإصابة بنفس المرض
لإنه بيمنع التغذية السليمة للعصب البصري.

الجلوكوما:

هو أحد الأمراض المزمنة و تحصل بسبب إرتفاع ضغط العين و دا اللي بيؤدي لضعف العصب البصري و تلفه و بالتالي بيوصل الحال للفقدان التدريجي للبصر و لكن الجلوكوما هو مرض ممكن يتعالج بالأدوية او بعض الحالات الحرجة بيتم فيه التدخل الجراحي.

علاج الجلوكوما :

  • ترشيح سائل العين:
    هو تقنية بتستخدم لخفض مستوي الضغط علي العين و دا بيساعد في إيقاف أو إبطاء تطور الجلوكوما و بالتالي المحافظة علي البصر.

  • الترقيع الإختياري باليزر :
    الترقيع الإختياري باليزر SLT هو علاج بيستخدم الليزر لحل مشكلة الجلوكوما و بيتم إستخدام الليزر لتحسين عملية تصريف السوائل

  • ليزر النبضات الدقيقة:
    هو علاج بديل باليزر بيعتمد علي تقليل كمية السوائل اللي بتنتجها العين و بالتالي بيقل مستوي الضغط في العين.

  • إستئصال جزء من القزحية باليزر:
    هي عملية لأستصال القزحية الطرفي الجزئي و دا بيستخدم لعلاج أحد انواع مرض الجلوكوما و إسمه الجلوكوما مغلقة الزاوية. الزاوية هي جزء موجود داخل العين وظيفته إن بيتم فيه تصريف سوائل العين و لو كانت الزاوية دي ضيقة أو مغلقة دا بيمنع تصريف السوائل.

5.القيام بمجهودات قد يسبب إنفصال الشبكية:

إنك تعمل مجهود دا مش بيسبب إنفصال الشبكية لكن في الثمانينات لما بدأت تتطبق عمليات الشبكية كان الدكتور بينصح المريض بالراحة عشان ترجع الشبكية لمكانها و نصيحة دي لسه سارية لحد دلوقتي . و لكن دلوقتي مع تقدم التكنولوجيا بقي ممكن إن المريض يعيش حياته بشكل طبيعي.

إنفصال الشبكية:

هو مرض بيحصل بسبب إنفصال البطانة الموجودة عند مؤخرة العين(الشبكية) بالإنفصال عن جدار العين و بالتالي الشبكية مش بيتم إمدادها بالدم و دا اللي بيخلي الخلايا العصبية تموت.

أعراض مرض إنفصال الشبكية:

  • فقدان الرؤيه تماما او فقدان جزء من مجال الرؤيه.
  • ومضات ضوء قصيرة و مفاجئة و بتبقي مدتها مبتعديش الثانية
  • ظهور نقط او بقع سوداء
  • رؤية ظل معتم.

علاج إنفصال الشبكية:

تدخل جراحي عاجل و لو تأخر التدخل الجراحي ممكن المريض يصاب بالعمي و يبقي صعب العلاج.

6. الحمل بيزيد مخاطر قصر النظر و إنفصال الشبكية

في إعتقاد غريب منتشر بين الناس إن الحمل بيزيد من حدة قصر النظر. الطبيعي إن العين بتمر بتغييرات كتير جدا في فترة الحمل زي باقي أعضاء جسم المرأة بس دا تغيير مؤقت بيختفي بعد الرضاعة لكن التغير في درجة البصر بيحصل بسبب التقدم في العُمر. لكن فيه نوع معين من إنفصال الشبكية ليه فعلا علاقة بتسمم الحمل.

7. لا يمكن تصحيح الحول عند كبار السن

في ناس كتير بتعتقد إن مش ممكن تصحح الحول عند كبار السن و دي فكرة خاطئة عشان بيمكن تصحيح الحول في أي مرحلة سنية بنسبة نجاح تفوق ال99% لكن ممكن يحصل رؤية مزدوجة بعد العملية و دا شيء طبيعي مش محتاج إنك تخاف منه.

الحول:

هو عيب بصري بيجعل العينين في حالة غير متوازنة و كل عين بتروح في إتجاه مختلف عن التانية.وذكرت أحد الدراسات إن 85% من مرضي الحول كبار في السن و 70% قالوا إن الحول كان ليه تأثير سلبي عليهم و أصاب ثقتهم في نقسهم و صورتهم الذاتية.

أسباب الحول :

  • حول خلقي و دا بيظهر بعد الولادة مباشرة و بيبقي في ال 6 شهور الأولي
  • الإصابة بطول النظر أو قصرالنظر
    – قصر النظر: لو إقترب جسم من العين جدا بتفقد العين القدرة علي التركيز فبتتحرك بشكل مش صحيح لكن قصر النظر بيسبب غالبا حول وحشي (خارجي)
    – طول النظر: لكن لو كان الجسم بعيد عن العين و فقدت العين القدرة علي التركيز و دا بيبقي بسبب الحركة الغير متوازنة للعينين مع بعض (يعني مثلا ممكن عين تتحرك في إتجاه و التانية في إتجاه تاني) و طول النظر بيسبب حول أُنسي.
  • الإصابة ببعض أمراض الجهاز العصبي اللي بتعمل خلل في عضلات العين.

أنواع الحول :

  • حول دائم : و دا اللي بيحصل علي طول.
  • حول متقطع: ودا بيظهر في وقت و يختفي في وقت
  • حول متبادل : و هو إنتقال الحول من عين للعين التانية
  • حول مخفي: و دا بيظهر في حالة الكشف الطبي او الإرهاق

علاج الحول :

علاج الحول بيتم عن طريق حاجتين:

  • النضارات : عشان بتساعد علي زيادة تركيز العين
  • التدخل الجراحي.

8. القراءة في الضلمة بتضعف البصر

ضمن الأساطير اللي منتشرة بين المصريين إن القراءة في الضلمة أو الإضاءة الخفيفة من الأمور اللي بتضعف النظر و بتضر العين لكن دا مش صحيح تماما بس إنت ممكن تصاب بإجهاد العين أو بالصداع بسبب الإضاءة الضعيفة لكن دا مش حيضعف النظر.

9. أشعة الليزر مؤلمة جدا للعين

أشعة الليزر بتستخدم في علاج حالات كتير من أمراض العيون زي إعتلال الشبكية الناتج من مرض السكري و في حالات إرتفاع ضغط العين و بيتم العلاج بأجهزة الليزر و بيبقي جهاز شبه جهاز فحص العين و الدكتور بيحط نقط عشان تخدر العين و متحسش بأي وجع و العلاج باليزر بيحتاج لدقائق قليلة و مش بيسبب اي الم للعين و بيقدر المريض إنه يروح عادي.

أنواع عمليات الليزك:

الليزك السطحي أو PRK:

هو أقدم انواع الليزك و أقدم الطرق اللي بتستخدم الليزك لعلاج أمراض العيون بسبب الألم اللي بيسببه  عشان كان بيتم العلاج بيه عن طريق تسليط الليزر مباشرة للقرنية في العين بشكل شعاعي بدون إبعاد طبقة القرنية السطحية و دا اللي بيخلي المريض يحس بألم لما يتعرض للضوء أول 3 أيام بعد العملية
الحالة الوحيدة اللي بيستخدم فيها حاليا هي إن المريض تكون سماكة القرنية عنده ضعيفه

عملية اللايزك:

عملية اللايزك هي الشكل المطول لعملية الليزك السطحي و هي بتستخدم فقط لأصحاب القرنية الرقيقة.وهنا الجراح بيستخدم مشرط صغير عشان يبعد طبقة القرنية السطحية و بيحط مواد كحولية عشان تعمل طبقة سطحية علي القرنية بعدها بيستخدم الليزر عشان يعيد تشكيل سطح طبقة القرنية. و بعدين بيرجع الدكتور الطبقة الرقيقة فوق القرنية و بيحط عدسة طبية بيستخدمها نفس أستخدام اللاصق الطبي.

عملية الليزك التقليدي:

عملية الليزك التقليدي و هي عملية بتعتمد علي اعادة تشكيل طبقة القرنية في تصحيح البصر و بيستخدم اداة إسمها microkeratome عشان يفصل طبقة القرنية السطحية عن العين مع بقاء جزء منها ملتصق بالعين و بعدين بيستخدم الليزر عشان يصلح تحدب القرنية. لكن عملية الليزك التقليدي غير دقيقة.

عملية الفيمتوليزك:

هي عملية ليزك متطورة في عمليات الليزك اللي دكتور بيقدر فيها يعمل العملية من غير ما يستخدم الأدوات الحادة أو الدقيقة ، و كله بيتم عن طريق تقنية الفيمتو سكند ليزر.

عملية الفيمتو سمايل:

الفيمتو ليزك هو أحدث تقنيات الليزك و دا لأنه بيعالج عيوب ضعف البصر حتي لو كانت القرنية رقيقة، عمليات الفيمتوليزك و الفيمتو سمايل  هي أفضل و أسرع حل للحصول علي عيون سليمة.

10. أودي إبني ليه للدكتور و هو مش بيشتكي من عينيه

أهالي كتير مبيحبوش يودوا أطفالهم لدكتور العيون و دا عشان بيفتكروا إن أطفالهم حيخافوا من الدكتور لكن دا غلط جدا خصوصا إن زيارة دكتور العيون في السنوات الأولي مهم جدا و اهم زيارة هي الزيارة اللي بعد الولادة علي طول عشان بتخلينا نقدر نراقب الأمراض الخلقية زي الساد و الجلوكوما و لازم زيارة دكتور العيون في عُمر ال 3 سنين و 4 سنين علي الأقل مرة كل سنة عشان لو في أمراض متعلقة بحدة البصر و حركة العين يتم إكتشافها و محاولة معالجتها.

و غير الإشاعات و المفاهيم الخاطئة في عادات يومية بيعملها المصريين ممكن تسببلهم مشاكل كبيرة و عشان كدا لازم نحذر من العادات دي و منها:

  • إستخدام آلة حادة او الضغط بقوة لتفريغ الأكياس الدهنية في الجفن لأن دا بيرفع خطر الإصابة بتلف العين أو العدوي

  • العدسات الاصقة بتمنع وصول الأكسجين للقرنية و دا بيسبب نمو العدوي البكتيريا

  • عدم إستخدام نضارات الشمس و التعرض المباشر لأشعتها و دا بيخلي الأنسان في خطر إن يصاب بأمراض زي المياه البيضاء و الأورام و تليف في مركز الإبصار في الشبكية.

  • استخدام عدسة لاصقة للزينة و دي ممكن تدمر القرنية و تؤدي للعمي.

أهم الفيتامينات المؤثرة علي صحة العين و قوة النظر

الكلام اللي جاي كله بجد مفيهوش مفاهيم غلط 😀

  • فيتامين (أ)

    بيبقي موجود في الجزر مع الكاروتين اللي بيوفروا مصدر كبير للفيتامينات للعين عشان تقدر تقاوم و تعالج تحلل البقة الصفراء و المياه البيضا (إعتام عدسة العين)
    إعتام عدسة العين: هو مرض بيصيب عدسة العين الطبيعية القائمة خلف الحدقة و بيفقدها الشفافية و بيبتدي المريض يفقد البصر تدريجيا . و للمعلومة إنك تاكل جزر كتير مش حيخليك تقدر تشوف كويس في الضلمة زي البومة.

  • فيتامين (سي)

    بيتميز إنه مقوي عام للصحة و بيبقي موجود في الفواكه زي البرتقال والكيوي و في الخضار زي الفلفل ، و فائدته للعين إنه بيحاول يوفر المواد المضادة للأكسدة فبتساعد علي عملية إبطاء المياه البيضا و بتوفر الفيتامينات اللازمة للضمور البقعي.

  • فيتامين (E)

    هو مضاد للأكسدة و مضاد للمياه البيضا و الضمور البقعي كمان و فيتامين (E) بتقدر تلاقيه في المكسرات بشكل كبير زي اللوز و الفول السوداني و الجوز و بذور عباد الشمس

  • اللوتين

     هو من اهم الفيتامينات المغذية للعين خصوصا مع التقدم في السن و دا لإنه متواجد في شبكية العين عندنا و عشان كدا هو جزء مهم جدا من الرؤية الصحية السليمة و اللوتين بيتواجد في الخضراوات زي اللفت و السبانخ و بيساعد علي علاج مشاكل الرؤية المرتبطة بالتقدم في السن زي المياه البيضا و الضمور البقعي.

  • الأوميجا 3

    ضروري جدا لصحة العين لإنه بيساعد علي حماية الأوعية الدموية الضئيلة اللي بتحيط بشبكية العين من التلف، و من هنا نقدر نقول إن الفيتامينات اللي بتمد جسمك بيها عن طريق الأكل اللي بتاكله ممكن تشكل خط دفاع قوي جدا ضد الأمراض و تمنعها إنها تهاجمك.

أفضل الأكلات اللي بتحتوي علي فيتامينات و بروتينات مفيدة للعين

الكلام اللي جاي بردوا كله بجد مفيهوش مفاهيم غلط 😀

الدواجن

هي البديل الصحي لللحوم الحمراء و دا عشان فيها كمية كبيرة من الدهون  لحوم الدواجن الغنية بالزنك و البوتاسيوم والبروتين و الحديد و دي عناصر هامة و مفيدة جداً لصحة العين و البصر. و البوتاسيوم مفيد جدا لجسم الإنسان فهو يحافظ علي ضغط الدم الطبيعي وبالتالي بيمنع إنسداد الشرايين في العين.كما انه يحافظ علي صحة الأوعية الدموية و العضلات و دا مهم جدا نظرا لإن عضلات العين أكتر العضلات نشاط في الجسم. غير إنه بيحمي القلب من الجلطات و بيحافظ علي صحة العضم. أما الزنك فهو عنصر مهم جدا و حيوي و دا لإنه بيتواجد في الشبكية و كمان لإنه مسئول عن إنتاج الإنزيمات المرتبطة بصحة العين. و الحديد بيحافظ علي العين و بيكافح تلف العين ودا بيخليه يحافظ علي صحة العين مع تقدم العُمر و بيمنع شيخوخة العين.

البطاطا الحلوة

ودا لأنها غنية جدا بالبيتاكاروتين وهي أساسية جدا في صحة عملية الأبصار و كذلك كل الخضراوات او الفواكه اللي لونها برتقالي.

البيض والخيار و الأسماك

البيض عنصر مهم جدا و دا لإحتوائه علي الزنك،و فائدة الخيار هنا هو تهدئة العين و تقليل الضغط. أما الأسماك مهمة جدا لصحة العيون عشان بتحتوي علي كمية كبيرة من الأحماض الدهنية والأوميجا 3. و أفضل الأسماك هي السلمون و السردين و دا لإنها بتحتوي علي كميات أكبر من الأوميجا 3. حاول تاكلهم شكل منتظم عشان تحسن صحة عينك.

السبانخ

ودا لإنها بتحتوي علي كمية كبيرة من الفيتامينات و أهم العناصر دي هي فيتامين C، اللوتين، الزيكساثين، ومادة البيتا كاروتين و غير كدة السبانخ بتحتوي علي مضادات أكسدة اللي بتساعد العين علي مكافحة الأمراض.

إيه بقي الأكل الضار لعيونك

الحلويات المصنعة

و دا بيبقي بسبب إن داخل فيها مواد كتير مُصنعة زي مكسبات الطعم و الريحة و الزيوت و بتحتوي علي نسبة كبيرة من الكوليسترول الضار للجسم و بترفع نسبة الدهون المشبعة اللي ممكن تسبب ترسب الشرايين ،الدهون المشبعة بتتواجد في الزيوت النباتية بنسبة عالية جدا و دا بيساعد علي ترسب الشرايين و إنسداد الأوعية الدموية ودا غير إنها غير مستقرة فبتتأكسد في الجسم بسهولة.

الأكل المقلي

و دا لإنه بيستخدم فيه الزيوت النباتية.

السكر و المشروبات المحلاة

و دا عشان بيتواجد فيها الفركتوز اللي بيزيد من مخاطر زيادة ضغط الدم و إرتفاع نسبة الدهون الثلاثية و بيشكل خطورة علي الأوعية الدموية و بالتالي الشرايين و كل دا بيأثر علي عينك

تلخيص لكل ما سبق

في حاجات كتير منتشرة بين المصريين مش صحيحة و بعضها خرافات و دور كل واحد فينا إن مياخدش اي كلام يتقال قدامه علي أساس إنه مسلمات من غير ما يدور علي  اصل الكلام و إيه العوامل اللي عدت عليه لحد ما إتطور ووصل لحد عندنا. ونتأكد من إن الأفعال اللي بنعملها هي أفعال صحيحة مش حتضرنا علي المدي البعيد و بالذات لو علي عضو رئيسي زي العين اللي متداخل في كل عملية حيوية بيعملها الإنسان.