شيخوخة العين المبكرة و أمراض التقدم في العُمر

مع التقدم في العمر تغييرات كتيرة بتحصل في جسم الإنسان لكن التقدم في العمر مش هو العامل الأساسي المتحكم في الشيخوخة فقط .
في حاجات تانية كتير، و من هنا ممكن نروح لدراسة نشرتها الأكادمية الوطنية للعلوم بأمريكا و قالوا فيها إن التقدم بالعمر بيعتمد في المقام الاول علي عوامل خارجية مش عوامل وراثية، و إن نسبة تأثير العوامل الوراثية 20% فقط، و نشروا إحصائية تانية إن في بعض من الناس بيتقدموا في العمر بشكل أسرع 3 مرات من ناس غيرها ، علي عكس إن في ناس تانية السنة البيولوجية ليهم بتيبقي 16 شهر ونص.
وطبعا العُمر البيولوجي للشخص يُؤثر جدا في الشكل اللي بيظهر عليه، و دا السبب اللي بيخلي في تباين كبير جدا في أشكال الناس مع إنهم في نفس المرحلة العُمرية، زي مثلا التجاعيد و لون الشعر و الامراض المرتبطة بتقدم السن.
و من هنا نوصل إن مش شرط الشيخوخة و أمراض مابعد ال40 سنة تكون مرتبطة بالعُمر، لكن هي مرتبطة بالنظام الصحي و الغذائي اللي بيعشوا عليه و بيمارسوه من رياضة أو أكل صحي، و من هنا هنتكلم عن مصطلح شيخوخة الشباب

شيخوخة الشباب

دايما كان الإتجاه لدراسة الشيخوخة الي كبار السن بدون الإتجاه لدراسة الشباب ،ولكن إتعملت دراسة عن 954 شاب أغلبهم في سن الثلاثينات و الأربعينات، ودرسوا التدهور الفيسيولوجي علي أكتر من جهاز او عضو جوه الجسم زي مثلا الكبد و الرئة الأوعية الدموية
و الكلي و وظائف المناعة و العين. و من هنا قييموا الشيخوخة عند الشباب اللي مظهرش عليهم أعراض لأمراض تقدم العُمر
. إكتشفوا إن الشباب اللي في سن الثلاثينات و الأربعينات اللي كانوا بيتقدموا في العُمر و اللي بدأت تظهر عليهم أعراض الشيخوخة المبكرة قدرتهم الجسدية أقل بكتير من اللي مظهرش عندهم أعراض الشيخوخة المبكرة دا غير إن ظهر عندهم شيخوخة مبكرة في الدماغ و أعراض لضعف في الذاكرة و بطء في التفكير و إن مؤشر صحتهم بيسوء و دا بيخليهم يبانوا أكبر من سنهم بكتير.
إكتشفوا إن الناس اللي في منتصف العُمر اللي كانوا بيتقدموا في العُمر و أقرب للشيخوخة أقل قدرة جسدية عن غيرهم دا غير شيخوخة في الدماغ و إن مؤشر صحتهم أسوأ و شكلهم أكبر.

و زي مع تقدم العُمر بتقل القدرة الجسدية بتقل كمان  قدرة العين و أداءها مع الوقت. في وقت سابق كان الإعتقاد إن بداية من سن  الأربعين هو أكتر فترة بتقل فيها قدرة العين و لكن هل دا صح .. ؟ جاوب علي السؤال ده  بعد ما تشوف العلامات اللي بتدل علي تقدم جسمك في العمر بسرعة.

إيه هي العلامات اللي بتدل علي تقدم جسمك في العُمر بسرعة ؟

1. جفاف الجلد و تقشره :

أول حاجة بيبتدي يظهر عليها علامات التقدم في السن هو الجلد و خصوصا بعد سن ال25، لكن جفاف الجلد و تقشره ممكن يظهر قبل كده بسبب العوامل المعاكسة، ومن العوامل المعاكسة اللي بتؤدي لجفاف الجلد هي:

  • إنك متشربش مياه بشكل كافي و ده بيسبب جفاف الجلد بشكل عام
  • تعرض الجلد لأشعة الشمس بشكل مستمر
  • الإصابة بالحساسية سواء من أكل معين أو دوا معين.
  • كسل في أداء الغدة الدرقية
    و مع الوقت بتبدي العلامات دي تظهر اكتر و اكتر، و من الممكن إن يكون علامات التقدم في العمر عند ناس مقارنة بناس تانية في نفس العُمر علامة علي الشيخوخة المبكرة،لكن لو كان الجلد جاف علي طول و فيه تشققات واضحة وفيه بقع صبغية و تجاعيد دا دليل علي مشاكل في الغدة الصماء

إزاي تمنع ده: حافظ علي نظام غذائي صحي و متوازن، فيه خضار وبالذات الخضراوات الورقية و الأطعمة الغنية بالدهون الغير مشبعة زي المكسرات و الزيوت النباتية

2. الإجهاد البدني :

أوقات كتير حاجات بسيطة بتسبب إجهاد كبير زي المشي و زي الوقفة، لعب الكورة، طلوع السلم. لكن دا مش بسبب زيادة الوزن بس او عدم ممارسة رياضة كتير لأ دا ممكن يكون بسبب فرق بين عمرك البيولوجي و عمرك الزمني… خصوصا بعد عُمر الأربعين بيبتدي عضلاتك تنقص و تقل …

إزاي تمنع ده:  عن طريق إنك تمارس رياضة بتحبها بانتظام عشان متبقاش بتجبر نفسك مع انك تحاول تكون نشيط في حياتك في المطلق

4. التجاعيد حول العين :

تجاعيد العين هي أول حاجة بتظهر علي الوجه و بتبقي سهلة الملاحظة و خصوصا إن الجلد حول العين بيبقي أكتر حاجة بتتأثر بالعوامل الضارة الخارجية والداخلية، ودي أول منطقة بيبان عليها الشيخوخة المبكرة و بيرجع دا لعدد من العوامل زي الإجهاد و قلة النوم والضغط العصبي والتعرض لأشعة الشمس بشكل مباشر، و التدخين بشكل مُفرط أو بسبب عوامل وراثية و بتتصنف كعلامة من علامات التقدم في السن و الشيخوخة..
التجاعيد تحت و فوق العين او بمسمي تاني و هو “أكياس العين” بيخلي عُمرك يبان إنه أكبر بمراحل، و دا عشان عضلات العين بتشتغل بشكل متواصل و دا بيتسبب في إن الجلد بيفقد نضارته ومرونته فبيبتدي يتمدد أو ينكمش، و بتبتدي المساحات دي تتملي بالدهون.
لو بدأت علامات التجعيد حوالين العين و تكون أكياس العين قبل سن الاربعين فده دليل علي وجود خلل في الأجهزة الداخلية للجسم و ده بيشير لتقدم معدل نمو عمرك البيولوجي في السن وبالتالي بيشير الي أعراض الشيخوخة المبكرة.لكن في بعض الأوقات التكيس تحت العين بيبقي بسبب الشكل التشريحي للوجه و دا بيبقي عامل وراثي أو بسبب إن الجلد مش مرن و دا بيختلف عن علامات التقدم في العمر.

إزاي تمنع ده:  حاول تبعد عن الأماكن اللي بتعرضك لضوء شمس مباشر و كبير،و حاول تستخدم كريم واقي للشمس بدرجة وقاية SPF30 علي الأقل او استخدم كريم مرطب للجلد و البشرة في المطلق علشان يحميها من الجفاف و يقلل من إصابتها بالشيخوخة المبكرة ،  تنام بشكل كافي إنه يدي جسمك الراحة و إنه ينتعش من جديد و تبعد عن الأكل المملح.

4. اضطرابات النوم :

إضطرابات النوم وحدها مش شرط يدل علي الشيخوخة المبكرة، ولكن ممكن تكون بسبب عوامل تانية بتساعد على عدم النوم زي القلق او الضغط الشغل او التفكير الكتير.

إزاي تمنع ده:  ممارسة الرياضة مفيدة جدا زي السباحة و الجري بتفيد الجسم في مساعدته علي النوم بشكل متزن و طبيعي، وقراءة كتاب قبل النوم بتفيد أكتر من إنك تقلب في الموبايل أو تتفرج علي التلفزيون او اللاب توب.

4. اضطرابات الدورة الشهرية :

إن كانت الدورة الشهرية غير منتظمة فده ممكن يكون دليل علي الطمث المبكر، و ده طبيعي في حالة إن بدأ إنقطاع الطمث في المرحلة العمرية بين 46-54 سنة إنما إن حصل قبل كدا فده دليل علي الشيخوخة المبكرة لأجهزة الجسم الداخلية، أعراض الطمث المبكر: هي التقلبات المزاجية و إرتفاع درجة الحرارة و القيء.

إزاي تمنع ده:  إنك تروحي لدكتور النساء بشكل دوري و المحافظة علي النظام الغذائي الصحي و المكملات الغذائية.

4. انتفاخات العين :

العيون المنتفخة هي واحدة من أكبر المشاكل اللي بتواجه العين و بتسبب بشكل مباشر في شيخوخة البشرة المبكرة، و بيرجع سببها لكتر الأكل المملح و قلة شرب المياه و قلة النوم بشكل كافي .

إزاي تمنع ده:  أهم حاجة عشان تمنع إن عينك تتنفخ هي إنك تمشي علي نظام غذائي سليم و أسلوب حياه سليم، حاول تنام بشكل كافي يريح جسمك وينعشه و خصوصا بليل و عدم السهر لأوقات كتير، غير إنك تبعد عن الأكل المملح.

ودلوقتي هنتكلم عن العين و هل فعلا بيبتدي يبان عليها علامات الشيخوخة بعد سن الأربعين فقط ولا لأ ؟

شيخوخة العين و الأمراض المرتبطة بالعُمر

كان الفكر السائد إن بعد ما الإنسان يوصل لأربعين سنة بيبتدي النظر يضعف و قدرة العين بتقل و عشان كده بيحتاجوا لنضارات القراءة حتي و إن مكنش بيتستخدمها قبل كده لكن ده مش صح لإن في حاجات تاني كتير بتأثر في شيخوخة العين لإن مع التغييرات التكنولوجية و النظام الغذائي الخاطئ وعدم ممارسة الرياضه زادت الأسباب اللي بتؤدي الي شيخوخة العين و دا اللي أثبت إن أعراض شيخوخة العين مش مرتبطة بالتقدم في السن بس لكن مرتبطة بالنظام الغذائي ونظام الحياه وعشان كدا لازم نفرق مابين أعراض التقدم في العُمر او التغييرات اللي بتحصل بسبب أمراض تانية… وبتبتدي أسباب اللي بتؤدي للشيخوخة المبكرة للعين من أول ما الطفل يتولد عن طريق الأكل اللي بياكله أو الأجهزة الإليكترونية اللي بيتعرضلها.

و من هنا هنقسم الأمراض و الأسباب اللي بتصيب العين بالشيخوخة المبكرة لجزئين

شيخوخة العين بعد سن الأربعين

شيخوخة العين قبل سن الأربعين

أولا أمراض العيون قبل سن الأربعين و أسبابها و طرق علاجها

1. جفاف العين :

في سن الطفولة حاليا أصبح الأطفال أكثر عرضة لأمراض كتير بسبب الإستهلاك التكنولوجي اللي بيتعرضله كل يوم، و دا بيخليهم عرضة للإصابة بمرض جفاف العين أسرع من غيرهم… وده يعتبر أكتر أمراض العين اللي بتحصل بسبب الأجهزة الإليكترونية، طيب يعني إيه جفاف العين : هو الحالة اللي العين مش بتفرز فيها دموع كتير و فائدة الدموع إنها بتحافظ علي صحة السطح الأمامي للعين وبتغسل العين من الأتربة و بتسهل الرؤية.

أعراضه :

  • إحمرار العين
  • إحساس بالإرهاق في العين
  • الشعور بالخدش او بوجود حبة رمل في العين
  • مخاط لزج في العين

و هنا الوقاية بتكون إن تبعد عن الشاشات لوقت أكتر أو إن الشاشة تكون تحت مستوي العين.وشرب كميات كتيرة من المياة و الأكل الصحي

2. إجهاد العين :

و هو مش حاجة خطيرة لكن بيبقي مؤشر في إزدياد تجاعيد العين و ظهورها و اللي بتسرع من الشيخوخة المبكرة

أعراضه :

  • صداع
  • الرؤية المشوشة
  • صعوبة التركيز
  • الشعور بالحاجة لقفل العين

و هنا الوقاية بتكون عن طريق :

  • تقليل الوقت اللي بيقضيه الطفل علي الكومبيوتر أو الموبايل و تبديله بألعاب خشبية عشان يقوي أعصاب اليد ، و البالغين كمان 
  • عدم التعرض لأشعة الشمس الضارة
  • قلة السهر و النوم بشكل كافي لراحة الجسم

وبالنسبة للراشدين والبالغين ماقبل الاربعين … بتزيد خطورة الأمراض اللي ممكن يتعرضولها بسبب الإستخدام الخاطيء او العادات الخاطئة زي التدخين ،زيادة الوزن، الأكل الغير صحي، عدم ممارسة الرياضة ، التعرض لأشعة الشمس، إستخدام الكمبيوتر و الأجهزة الإلكترونية بكثرة و عدم إراحة العين منهم لوقت كافي

و من أكتر الأمراض اللي ممكن تحصل بسبب التدخين والعادات السيئة هي :

3.إعتام عدسة العين :

وهو مرض بيصيب عدسة العين و بيمنع الرؤية تدريجيا و بيتم تسميته بإسم تاني و هو المياه البيضاء أعراضه إن بيزيد التشوش في الرؤية و بيبقي صعب الرؤية بليل و من أهم أسبابه التدخين الكتير و التعرض لأشعة الشمس .

طرق الوقاية: هو الإمتناع عن التدخين وعدم التعرض لأشعة الشمس

4.إحمرار العين :

و هو بيبقي إحمرار و تورم في الملتحمة و هو الغشاء اللي بيبطن العين من الداخل و لما بيحصل تهيج للملتحمة بتبقي حمراء جدا

و أسبابه:

  • جفاف العين
  • الميك أب و مواد التجميل عشان فيها مواد كيميائية مضرة للعين
  • التدخين
  • الحساسية
  • التراب و التلوث الجوي

طرق الوقاية :

  • الإمتناع عن التدخين
  • تجنب الاماكن اللي فيها اتربة عالية
  • الحذر في استخدام مستخدمات التجميل بكثرة او عدم معرفة اثارها الجانبية والطريقة الصحيحه …

إزاي تأخر شيخوخة العين:

نصائح عشان تأخر شيخوخة العين

زي ماقولنا تأخير شيخوخة العين بيبتدي من الشباب و النظام الغذائي والرياضي اللي بتتبعه في حياتك … خصوصا إن الرجالة و السيدات إكتسبوا السنين اللي فاتت 14 سنة زيادة علي عمرهم و بقي متوسط العمر الحالي للرجالة 72 سنة و 84 سنة للسيدات. و من أحد الأسباب في شيخوخة العين هي إن حجم عدسة العين بتكبر و بتقل مرونتها مع التقدم في السن و بتضعف الرؤية و ممكن تقل شفافيتها و ده مسماه الطبي “إعتام عدسة العين”.


نظام غذائي سليم يشمل الخضروات و الفواكه


حافظ علي وزن صحي


تريح عينك كل نص ساعه


النوم بشكل كافي للجسم عشان يرتاح


ممارسة الرياضة


النضارات الشمسية من الحاجات المهمة لصحة العين


ما تقعدش قدام التلفزيون و الموبايلات وقت طويل


ضبط مستوي السكر و ضغط الدم


إبعد عن الأكل المالح


الإمتناع عن التدخين

أهم الفيتامينات الضرورية لسلامة العين و تقليل شيخوختها:

  1. الأغذية الغنية بفيتامين (ج) المفيد للأوعية الدموية و بيقلل من فرصة الأصابة بإعتام عدسة العين وبيبقي موجود في الفلفل والفراولة والقرنبيط
  2. الأغذية الغنية بفيتامين (ه) و اللي بيقلل فرصة الإصابة من إعتام العين و عدم تطور مرض الضمور البقعي المرتبط بالتقدم في العُمر
  3. الأغذية الغنية بالأوميجا 3 اللي بتحمي العين من مرض الزرق و الضمور البقعي و بتحافظ علي رطوبة العين
  4. الخضار والفاكهة اللي لونها برتقالي عشان بتحتوي علي نسبة عالية من البيتا كاروتين اللي بتساعد في الرؤية الليلية
  5. البروكلي و الكرنب لإحتوائهم علي مضادات الأكسدة

ثانيا أمراض العيون بعد سن الأربعين و أسبابها و طرق علاجها

مع سن الأربعين حتبتدي تلاحظ لوحدك الفرق و التغير في النظر و ممكن تحس بتشوش و أوقات صعوبة في تمييز بعض الألوان والتغييرات دي هي حاجة طبيعية جدا في مرحلة الشيخوخة و مع التقدم في العُمر بتزيد الفرصة في الإصابة بأمراض العيون زي الضمور البقعي و المياه البيضاء و مرض السكري للعين و المياه الزرقاء وإنخفاض الرؤية و جفاف العين

1. الضمور البقعي

المعهد الأمريكي للعيون بيصنف الضمور البقعي إنه السبب الرئيسي للعمي بين كبار السن وإن تعداد الناس اللي بيعانوا من الضمور البقعي في أمريكا حوالي 2 مليون شخص و من المتوقع إن النسبة دي تتصاعف و توصل لأكتر من 5 مليون أمريكي مصابين بالضمور البقعي في سنة 2050.
وهو مرض بيدمر الرؤية الحادة و المركزة تدريجيا وبيصعب من إنك تقوم بمهامك العادية زي القراءة والسواقة… ويسبب فقدان البصر تدريجيا.

إزاي تكتشف ضمور العين:
المراحل المبكرة او المتوسطة في مرض ضمور العين بيتم إكتشافها عن طريق فحص العين المتوسعة الشامل…

إزاي تقلل خطر إصابتك بضمور العين:

  • تجنب التدخين.
  • ممارسة الرياضة
  • تناول أكل صحي
  • الحفاظ علي مستوي الكوليسترول و ضغط الدم

2. المياه الزرقاء

بيزيد خطر الإصابة بمرض الزرق بعد الأربعين و بيفضل تدريجيا بيزيد خطر الإصابة بيه لحد سن ال80 ،و هو من الأسباب الأساسية للعمي في الولايات المتحدة.  
الزُرق هي مجموعة أمراض بتهاجم العصب البصري و بتتلفه بسبب قلة الدورة الدموية أو الارتفاع الكبير لضغط العين..

إزاي تكتشف مرض الزُرق:
بتبدي تلاحظ تغيير في الرؤية بشكل تدريجي و بتصعب الرؤية الليلية و لو حصل و فقدت الرؤية بسبب الزُرق بيبقي صعب ترجع تاني عشان كدا مهم جدا الفحوصات الدورية للعين و بالذات قياسات ضغط العين لإن لو تم إكتشاف الزُرق بدري بيتم إبطائه أو منعه علي حسب تدهور الحالة و في المراحل الأولي لمرض المياه الزرقاء بيكون غالبا بدون أعراض و عشان كدا المريض كتير بيتشخص في المراحل المتأخرة و عشان كده مهم جدا نفحص قرايب الدرجة الأولي لمريض عنده المياه الزرقاء. و في الحالات المتأخرة و المتقدمة من مرض المياه الزرقاء بتبتدي تظهر الأعراض

أعراضه :

  • صداع
  • ألم في العينين
  • قيء
  • إحمرار العينين
  • عدم وضوح الرؤية

لازم نأكد إن لو مروحتش للدكتور فورا فدا ممكن يسبب إنك تفقد نظرك تماما ، بتشهد أساليب العلاج لمرضي الزُرق تطور كبير و الأهم هو إكتشافها في مراحل مبكرة عشان كدا لازم تحرص علي الإهتمام بزيارة الدكتور بشكل دوري لتشخيص الحالة و معرفة أفضل حل أو علاج أو اجراء لازم يتاخد ليها.

3- اعتلال الشبكية السكرى

بيرتبط بمرضي السكري اللي عندهم 40 سنة أو أكتر و في دراسات بتقول إن 40% من اللي عندهم مرض السكري بدرجة عالية أكتر عرضة للأصابة بمرض أعتلال الشبكية السكري ، وإعتلال شبكية السكري هو التورم وتراكم السوائل في الشبكية و بيحصل لما بتتسرب السوائل من الأوعية الدموية في مركز العين و بيسبب إنخفاض الرؤية و بيوصل لنزيف في الشبكية  و هو بيجي للناس اللي عندها مرض السكري لفترة طويلة و هو واحد من اكتر الأمراض المعقدة الناتجة من المراحل المتقدمة لمرضي السكري

إزاي تكتشف مرض أعتلال الشبكية السكري:

صعوبة الرؤية سواء كانت الرؤية القريبة أو البعيدة و المريض بيعاني غالبا من رؤية ضبابية

طرق علاجه بتكون عن طريق التدخل الجراحي فورا و بيكون فيه 3 إختيارات :

  • العلاج بالليزر البؤري : و هنا بيلجأ الدكتور إنه يبطأ او يوقف تسرب الدم أو السائل في العين و بيتم معالجة تسربات الأوعية الدموية بحروق الليزر
  • العلاج باليزر المبعثر: وهنا بيلجأ الدكتور إنه يقلص الأوعية الدموية الغير طبيعية و بيعالج مشكلة شبكية العين
  • استئصال الزجاجية: وهنا بيلجأ الدكتور إنه يعمل جرح صغير جدا عشان يشيل الدم من وسط العين

تلخيصا لكل ما سبق

أمراض العين و الشيخوخة المبكرة مش مرتبطة بسن الأربعين، ولكن مرتبطة بالنظام الصحي و الغذائي و أسلوب الحياه اللي بتتبعه من أكل صحي ،ممارسة الرياضة ، عدم إجهاد العين ، عدم مشاهدة الأجهزة الإلكترونية لفترات طويلة والإمتناع عن الأكل المالح ، و دول مش بيأثروا في تقليل شيخوخة العين المبكرة لكن بيأثروا في تقليل شيخوخة الجسم و الأعضاء ككل و أهم شيئ هو زيارة الدكتور بشكل دوري عشان تكتشف الأمراض في مراحلها الأولي و دا بيبقي أكتر وقت تقدر تقلل أو تمنع أي مرض فيه.

عايز أحجز معاد مع الدكتور