1

علي الرغم من إن العين البشرية مميزة جدا بحجمها الصغير لكن دايماً العلماء باختلاف مجالاتهم كانوا بيقفوا عندها ويأكدوا قد إيه العين الصغيرة دي هي تركيب مُعقد ومُبهر جداً في حد ذاته… حتي الفلاسفة أبدعوا جداً في وصف العين… في سنة 1802 وصف الفيلسوف ويليام بالي العين بمُصطلح ” مُعجزة التصميم “…
وحتى تشارلز داروين كتب في كتابه ” أصل الأنواع ” عن العين وتطورها ومدى تعقيدها.
عشان كده التركيب المُبهر للعين كان لازم يخلينا ناخد رحلة بسيطة مع العين من بداية مرحلة الطفولة لحد مرحلة الشيخوخة عشان نفهم مدي تطورتركيبها وإيه الأمراض والمشاكل اللي بتواجه العين في رحلة الإنسان باختلاف المرحلة العُمرية “من الولادة حتي الشيخوخة “

تكوين العين

العين بتتكون من 3 طبقات رئيسية

1

الطبقة الأولى : القرنية

الطبقة الصلبة و الخارجية للعين…وهي الجزء الوحيد في جسم الانسان اللي مش بيحتوي علي آى أوعية دموية وبتاخد كل اللي بتحتاجه من طاقة وغذاء من السائل المائي اللي بتفرزه العين للترطيب.

1

الطبقة الثانية : المَشيمية

دي بيكون مكانها بين طبقة الشبكية والقرنية وبتختلف عن القرنية في إنها عندها أوعية دموية هدفها التغدية وتوصيل الدم المُحمل بالأوكسجين لشبكية العين… الطبقة المشيمية بتتميز بوجود صبغة اسمها الميلانين (Melanin pigment) والصبغة دي بيكون دورها إنها تمتص الأشعة الضوئية اللي بتسقط علي العين وبتمنع إنعكاس الضوء علي سطح العين… والامتصاص ده هو السبب في تكون الرؤية عندك …
بشكل مُفصل أكتر لو دخلنا جوه الطبقة المَشيمية دي هنلاقي جزئين جزء أمامي وجزء خلفي…
الجُزء الأمامي بنسميه القزحية وده عبارة عن القرص الملون اللي موجود حوالين النقطة السوداء اللي في عينك بالضبط واللي بيختلف لونة من شخص لاخر …
الجزء الخلفي من الطبقة المَشيمية بيتمثل في الجسم الهدبي. والجسم الهدبي ده مكانه بيكون ورا القزحية بشكل مباشر وبيكون حواليه زوائد بتفرز السائل المائي اللي بيغدي القرنية.

1

الطبقة الثالثة : الشبكية

ودي آخر طبقة في تكوين العين وبتبطن الطبقة المَشيمية وبتتكون من طبقتين الوريقة العصبية الداخلية والوريقة العصبية الخارجية. الوريقة العصبية الداخلية بتكون مسئولة عن تخزين كميات كبيرة من فيتامين أ (Vitamin A) بالإضافة لجعل جوف كرة العين مُظلم فيساعد في تحقيق وضوح الرؤية. أما الوريقة العصبية الخارجية بتتكون من ألياف عصبية بتسمح بالإحساس داخل العين.

آلية الرؤية في العين

  • الرؤية في العين بتعتمد علي تجميع أشعة الضوء. لما الضوء بيسقط علي آي جسم …

  • الجسم بيتمص جزء من الضوء ده وبيعكس الباقي … فبيكون دور القرنية في العين إنها تجمع الأشعة المُنعكسة من الأجسام…

  • بعد ما بتتجمع الأشعة في القرنية بتتنقل لشبكية العين…. شبكية العين بتتميز بوجود عدد كبير جداً من الخلايا العصبية الحساسة بيكون دورها إنها تحفز تكوين شحنات كهربائية من خلال الأشعة المُتجمعة في الشبكية، وتبدأ الشحنات دي في انها تتحرك عن طريق العصب البصري للجزء المتخصّص بالإبصار في الدماغ عشان الدماغ يبدأ يترجم الشُحنات دي لصور وأشكال. 

تخيل إن العملية المُعقدة دي بتتم في أقل من ثانية عشان تشوف الصورة في لحظتها وده من أكبر إعجازات جسم الإنسان.

تطور العين والرؤية عند الأطفال

بعد الولادة رؤية الطفل مبتكونش اكتملت بالشكل الكافي اللي بيشوف بيه الكبار وبتبدأ الرؤية تتطور وتتحسن مع نمو الطفل…

1
  • في البداية خالص الطفل مبيقدرش يُدرك الألوان لأن رؤية الألوان عنده بتكون ما بين الابيض و الاسود وبعض الظلال الرمادية فبالتالي الاحمر والازرق بالنسبة للطفل دي مش ألوان ملحوظة والسبب في كده بيكون عدم اكتمال نمو الخلايا العصبية الموجودة في الشبكية واللي بتتصل بالمخ ودورها بيكون مُرتبط بالإحساس بالرؤية والألوان…
  • في عمر الشهر بتكون حساسية عيون الاطفال للضوء ضعيفة جداً فلو هنقارن ما بين كمية الضوء اللي محتاجها الشخص البالغ عشان يستشعر الضوء والطفل في عمر شهر هنلاقي إن الطفل محتاج 50 ضعف الكمية اللي بيحتاجها البالغ وده بسبب ضعف حساسية العين عند الأطفال.
  • كل يوم وكل شهر بيعدي بعد ولادة الطفل بيتم تكوين خطوة في تحسين الرؤية… اكتمال نمو الخلايا العصبية… زيادة الاستشعار للألوان وتطور العين للتفرقة بين الألوان حسب الأطوال الموجية المُختلفة… غير أن حركة العين بتبدأ تتنظم اكتر … وبتفضل مراكز الرؤية عند الطفل تتحسن وتنمو …
  • مع اقتراب الطفل من عمر 6 شهور من المُفترض إن الرؤية تكون مُشابهة للبالغين بحد كبير جداً..
  • لحد اقتراب الطفل من مرحلة البلوغ قوة الإبصار ممكن تضعف أو تزيد لكنها بتثبت عند الجميع في الغالب في سن الـ 18…

عشان كده معظم إجراءات تصحيح الإبصار بالليزر بتكون ما بعد الـ18 عشان تكون العين وصلت للثبات الدائم.

الأمراض والمشاكل اللي بتصيب العيون خلال مرحلة الطفولة

كل مرحلة عمرية بيكون ليها مشاكل وأمراض مُعرضة ليها بنسبة كبيرة عن آي فئة عُمرية غيرها عشان كده هنركز علي أشهر أمراض العيون اللي بتواجه الاطفال من بداية الولادة لحد مرحلة البلوغ

1

1. حول العين

من المُفترض إن الطفل الطبيعي يقدر يبص لحاجة واحدة مُعينة بعينيه الاتنين في نفس الوقت. لو الطفل مقدرش يحرك عينيه الاتنين مع بعض بنفس التتابع وبيحصل عنده إنحراف في عين واحدة او الاتنين في نفس الوقت لاي اتجاه عشوائي فمعني كده إن الطفل مُصاب بـ ” حول العين ” والحول مش شرط يبقي ثابت وظاهر في العين طول الوقت ممكن يبقي ثابت أو يظهر بشكل لحظي أثناء حركة العين أو أثناء ما الطفل مُجهد بدنياً.

لو الطفل مُصاب بالحول فده مش معناه بس إن شكل عينه هيبان مش طبيعي بالعكس الحول بيأثر علي رؤية الطفل وبيخليه يشوف الحاجة متكررة لأن كل عين بتتحرك في اتجاه مُختلف فبالتالي كل عين بتشوف بزاوية مُعينة وعشان المخ يقدر يترجم الرؤية بأوضح شكل ممكن بيتضطر إنه يتغاضي عن الصورة اللي شافتها واحدة من العين ويعرض صورة واحدة بس والصورة اللي بيتجاهلها بتكون صورة العين المُنحرفة لأنها بتكون الأضعف وطبعاً عدم علاج الحول مع الوقت بيقلل قدرة العين علي الإبصار لأن المخ معتمد علي رؤية عين واحدة فمن مضاعفاته مع مرور الوقت ظاهرة كسل العين ودي بتكون مشكلة كبيرة جداً.  

الحول ممكن يبقي خُلقي يعني الطفل يتولد بيه أو نتيجة مشكلة في الجهاز العصبي تأثر علي العين أو نتيجة إصابة مباشرة في العين تأثر علي عضلات العين وتسبب الارتخاء ده.

تشخيص الحول بيكون سهل من متابعة حركة عين الطفل وكل ما تم علاجه بشكل مبكر كان أفضل وأسهل وعلاج الحول بيكون عن طريق تقوية عضلات العين المُنحرفة (الضعيفة) إما عن طريق استخدام القطرات الطبية أو تصحيح النظر عن طريق النظارات الطبية أو التدخل الجراحي لكن اختيار التدخل الجراحي بيكون دائماً حل أخيراً في المشكلة دي.

1

2. افرازات العيون

نسبة كبيرة من الأطفال حديثي الولادة بيصابوا بإفرازات في العيون عبارة عن مواد لزجة زي الدموع لكن بتختلف بأنها بتكون سميكة أكتر ولزجة وليها لون أبيض مايل للأصفر.


وبتحصل الإفرازات دي نتيجة اسباب كتير اهمهم انسداد المجرى الدمعي في العين، والمجري الدمعي في العين دوره يفرز الدموع اللى بتغسل وتنقي العين لكن انسدادها معناه عدم قدرة الدموع علي الخروج فبالتالي بتتجمع الدموع بشكل كبير في مجرى الدمع وتخرج في صورة إفرازات سميكة … وطبعاً ده بيسبب جفاف العين وإصابة العين بالتهابات بسبب البكتيريا… في حالة زيادة معدل الافرازات ممكن يواجه الطفل صعوبة في إنه يفتح عينيه بسبب لزوجة الافرازات…

علاج افرازات العين بيكون سهل وبيكون عن طريق القطرات الطبية لكن بيحتاج تشخيص الطبيب عشان يقدر يحدد السبب الرئيسي في ظهور الافرازات دي عند الطفل.

1

3. رأرأة العيون (اهتزاز أو اضطراب حركة العين)

رأرأة العين بتشبه شوية فكرة حول العين في إن العين بتتحرك بشكل لا إرادي بسبب ضعف في عضلات العين …
أو ممكن تبقي بسبب خُلقي أو نتيجة اضطراب عصبي مؤثر على العين أو بسبب عامل نفسي زي الارتباك او التوتر أو ممكن تكون بسبب وراثي أو لو الطفل عنده مشاكل في العين زي إعتام العدسة أو الحول أو ممكن نتيجة إصابة في الرأس أو مشاكل في الأذن الداخلية …

في حالة رأرأة العين الطفل عينه بتتحرك حوالين محور واحد في حركة اهتزازية في اي اتجاه للأعلي أو للأسفل من غير أي قدرة منه علي منع الحركة الاهتزازية دى الحركة دي ممكن تبقي سريعة بشكل لحظي بعدين تقل سرعتها بالتدريج. وبتأثر الرأرأة على الطفل في إنها بتزود حساسية العين للضوء وبتقلل قدرة الطفل علي الرؤية بوضوح.


تشخيص الرأرأة بيعتمد علي عمل اختبار للأذن والأعصاب وأشعة مقطعية للدماغ وتسجيل حركات العين …
وعلاجها مش بيكون صعب بيختلف اعتماداً على تشخيص الطبيب ما بين تناول أدوية او لبس نظارات طبية تساعد في تحسين الرؤية أو اللجوء لجراحة العين.

امراض العين في مرحلة المراهقة وما بعد البلوغ

المرحلة العمرية دي مبيحصلش فيها تطور في الرؤية وبتكون العين وصلت لمرحلة من الثبات البصري اللى بيخلي كتير من اجراءات علاج مشاكل العين تتم بنسبة أكبر … لأن في مرحلة الطفولة أحياناً بتظهر مشكلة في العين لكن مع الوقت بتختفي لوحدها وأحياناً بيكون في مشكلة برضه في العين وبيكون صعب تشخيصها في الفترة دى وبتظهر بشكل أكبر في بدايات مرحلة المراهقة. أكتر المشاكل اللي بتظهر في الفترة دي هي العيوب الإنكسارية.

1

العيوب الإنكسارية

” العيوب الإنكسارية ” مُصطلح معناه وجود انحناء او تحدب في القرنية بشكل غير طبيعي بيأثر علي إنكسار الضوء على العين واللي بشكل عام بيأثر على الرؤية وتركيز الضوء على الشبكية.
فكرة انكسار الضوء علي العين بشكل عام قريبة لفكرة الكاميرا، فالقرنية بتمثل عدسة الكاميرا أما الشبكية بتمثل دور فيلم الكاميرا، فلو مكانش التركيز بدقة علي الصورة فالفيلم اللي هو الشبكية هيستقبل صورة مش واضحة والصورة اللي بتشوفها الشبكية هي اللي بتتبعت للمخ عشان يقدر يترجمها.

أنواع العيوب الإنكسارية

  • قصر النظر (Myopia)

    بيحصل في حالة إن القرنية تنحني عن المعدل الطبيعي فبالتالي الأشعة الضوئية هتسقط قبل الشبكية بدل من إنها تسقط على الشبكية مباشرة وبالتالي الرؤية البعيدة بتكون مش واضحة للمريض.

  • طول النظر (Hyperopia)

    وده عكس قصر النظر بالضبط الأشعة بتتجمع بعد الشبكية بدل من إنها تسقط على الشبكية مباشرة فبالتالي بتكون الرؤية القريبة هي اللي مش واضحة بالنسبة للمريض.

  • الاستجماتيزم ( اللابؤرية ) (Astigmatism)

    في الحالة دي درجة انحناء القرنية بتكون مش مستوية فبالتالي الاشعة الضوئية بتتجمع في أكثر من نقطة بدل من إنها تقع في نقطة واحدة على الشبكية فبالتالي بتبقي رؤية القريبة والبعيدة للمريض مش واضحة.

علاج العيوب الإنكسارية

تصحيح مشاكل العيوب الإنكسارية بيكون مُتاح بكذا طريقة وكل طريقة بيكون ليها مميزات وعيوب حسب راحة المريض، فممكن يتم عن طريق النظارات الطبية وهي تعتبر من أسهل طرق العلاج وآي شخص ممكن يلجأ ليها كذلك العدسات اللاصقة واللي بتقوم بنفس دور النظارة بالضبط وفكرتها في إنها بتبقي أخف والمريض مبيحسش بيها لكن من عيوبها طبعاً إنها بتحتاج عناية كبيرة عشان تحافظ علي العين وتمنع إصابتها بالعدوي أو البكتريا أو الجفاف أو الالتهابات وغيره…  
لكن عيب النظارات الطبية أو العدسات اللاصقة إنها تعتبر حل مؤقت مش جذري لحل المشكلة بشكل نهائي لكن الليزر بيغني عن ده في وقت سريع جداً وعلاج العيوب الإنكسارية بالليزر بيختلف حسب نوع العيب…

  • قصر النظر (Myopia)

    في حالة قصر النظر بيقوم الليزر بدوره ويخلي القرنية مُسطحة بشكل أكبر بحيث يقلل الإنحناء ويمنع تجمع الضوء امام الشبكية.

  • طول النظر (Hyperopia)

    في حالة طول النظر بيقوم الليزر بدوره إنه يخلي الجزء المركزي للقرنية أكتر تحدباً بحيث يمنع تجمع الضوء خلف الشبكية.

  • الاستجماتيزم ( اللابؤرية ) (Astigmatism)

    في حالة الإستجماتزم بيخلي الليزر القرنية أكتر دائرية ويشيل كل الانحناءات الموجودة علشان الضوء يرتكز بشكل مباشر على القرنية.

أمراض العين في مرحلة الكِبر والشيخوخة

مع التقدم العمر بتبقي العين مُعرضة لأمراض أكتر ده غير ضعف النظر اللي بيواجه كتير من كبار السن فبيلجأوا انهم يلبسوا نظارات طبية عشان تساعدهم على الرؤية ومن أكتر الامراض العيون اللي بتصيب الفئة دي هي …

1

1. أمراض العين الناتجة عن مرض السكر

مرض السكري بيصيب أكتر من 60% من كبار السن وبيكون ليه مُضاعفات صحية بتأثر علي باقي اعضاء الجسم من ضمنهم العين ومن أكتر الأمراض المنتشرة المتعلقة بمرض السكري هو  مرض إعتلال الشبكية …
والمرض ده بيأثر علي الأوعية الدموية الموجودة في شبكية العين وبيتلفها فبالتالي بيضعف النظر بشكل كبير وفي حالة عدم الرعاية الطبية ممكن تزيد المضاعفات لدرجة فقدان البصر بشكل كامل…
ولعلاج المشكلة دي إن المريض يحافظ علي علاج السكر ونسبته في الدم وفي حالة كبر السن الفحص الدوري بشكل مستمر مهم جداً لتفادي المشاكل دي.

1

2. الجلوكوما

مرض الجلوكوما من أشهر أمراض العين المرتبطة بتقدم السن .. والمرض ده بيدمر العصب البصري عن طريق زيادة ضغط العين نتيجة احتباس السوائل او غيرها…مشكلة مرض الجلوكوما إن ملوش اعراض قوية إلا في حالة تقدم المرض بشكل كبير ومع تقدمه بيأثر علي الرؤية لحد فقدان البصر. لكن ان تم اكتشاف المرض وعلاجه بشكل مبكر فده هيحافظ علي صحة المريض وبصره …وعلاج الجلوكوما بيختلف ما بين الليزر والجراحات الطبية او استخدام القطرات والقرار بيرجع للدكتور المعالج.

1

3.جفاف العين

مشكلة جفاف العين مش مقتصرة علي مرحلة عمرية محددة ممكن اي شخص يتعرض ليها بسبب التهابات او اي مشاكل في العين. لكن مع تقدم السن بتزيد مشكلة الجفاف بسبب قلة الدموع اللي بتفرزها العين وبالتالي في وجود جفاف العين أكيد هيكون في تأثير في عملية الابصار، ففي الحالات دي بينصح الطبيب المريض بترطيب العين بشكل مستمر وعدم التعرض لشاشات الكومبيوتر والهواتف المحمولة والتليفزيون حتي القراءة لساعات طويلة لتجنب ارهاق العين.

1

4.المياه البيضاء أو الكتاركت أو اعتام عدسة العين

المياه البيضاء هو مرض بيصيب عدسة العين فبيخليها تظهر مُعتمة وبيفقدها شفافيتها وبيسبب ضعف في البصر ..
والمريض بالمياه البيضاء بيعاني من حساسية قوية جداً للإضاءة القوية وبتكون الرؤية صعبة في الليل بالإضافة لشحوب في رؤية الألوان وعدم رؤية الاشياء بوضوح وممكن يصيب عين واحدة او الاتنين في نفس الوقت.
سبب المياه البيضاء في الغالب بيكون عن تقدم العمر أو نتيجة التعرض لصدمات أو الاشعاع أو بسبب إجراء عمليات جراحية بسبب مشاكل أخرى في العين وعدم معالجة المرض بيسبب في مضاعفات بتهدد بفقدان الرؤية. وعلاجها بيكون عن طريق عمليات جراحية بتم تحت تأثير المُخدر.

لو بتعاني من مشكلة في عينك ، أو حاسس بأحد الاعراض الموجودة فوق بننصحك تزور دكتور متخصص للإطمئنان 

عايز أحجز معاد مع الدكتور