ما هو الليزك

الليزك عبارة عن تقنية طبية حديثة بيتم استخدامها في طب العيون عن طريق معالجة تحدب قرنية العين باستخدام اشعة الليزر و الهدف منها هو معالجة حالات ضعف الإبصار المختلفة و الناتجة عن الحالات الأتية

  • قصر النظر

    وده المقصود بيه عدم وضوح الرؤية خصوصاً للأجسام البعيدة نتيجة لتجمع الأشعة الضوئية المكونة للصورة امام سطح الشبكية في حين انها المفروض تتجمع على السطح نفسه

  • طول النظر

    المقصود بيه عدم وضوح في الرؤية خصوصاً للأجسام القريبة نتيجة لتجمع الأشعة الضوئية المكونة للصورة خلف سطح الشبكية في حين انها المفروض تتجمع على السطح نفسه، واللي بيعاني من طول النظر او قصر النظر مابيبقاش مرتاح و بيكون محتاج جدا انه يستخدم نظارة و من هنا بيجي الليزك كحل ممتاز للتخلص منها وعلاج مشاكل ضعف الإبصار

  • الاستجماتيزم

    والمقصود بيه عدم وضوح الرؤية نتيجة لوجود خلل في المحاور البصرية للعين بينتج عنه اهتزاز للصورة المكونة لأي حاجة بتشوفها العين اما بشكل افقي او بشكل رأسي
    *ملحوظة* أوضح صورة بتتكون و تقدر تشوفها العين بشكل كويس هي لما تتجمع الأشعة المرئية الساقطة على العين فوق سطح الشبكية بشكل مباشر مش امامها ولا خلفها

اكتشاف تقنية الليزك وتطورها مع الوقت

اكتشاف تقنية الليزك جيه مع الاعتماد الكبير على الليزر في الحياة و خصوصاً في الحياة الطبية حيث ان الليزك بيعتمد بشكل اساسي على استخدام الليزر في معالجة تحدب قرنية العين ..استخدام الليزك بدأ سنة 1990 و كان للأطباء المصريين دور كبير في تأسيس التقنية دي و استخدامها على البشر عن طريق أبحاثهم … ومش بس كده .. مصر حاليا تعتبر من الدول المتقدمة جدا في إجراء عمليات الليزك بكل أنواعه وما زال الدكاترة المصريين لهم دور كبير في تطوير عمليات الليزك في العالم و دايما بيتاخد رأيهم من ناحية استشارية لمهارتهم في المجال ده

الليزك بأسمه الدارج او عمليات تصحيح الإبصار بإسمها الدقيق بدأت بنوع واحد و هو الليزك التقليدي و تطور إلى أن وصل لوجود 3 أنواع من عمليات تصحيح الإبصار هنتكلم عنهم بالتفصيل وهنوجهلك نصيحة في الاخر

لكن قبل ما نتكلم عنهم خلينا نلخص الموضوع في سطر واحد لما نجاوب السؤال ده (على ماذا تعتمد عملية الليزك؟)

بتعتمد على جزئين

 1- أداة لكشط جزء من السطح الخارجي للقرنية

 2- ليزر لعلاج الجزء الداخلي من القرنية

طالما فهمنا النقطتين دول هنفهم بالظبط ايه هم انواع الليزك و التطور اللي حصل في الليزك ده حصل بناء على ايه…

أنواع عمليات تصحيح الإبصار

بتتقسم عمليات تصحيح الإبصار لأنواع اعتماداً على تطور الجزء الخاص بكشط السطح الخارجي من القرنية بالشكل دا

  1. الليزر التقليدي

  2. الفيمتو ليزك
  3. الفمتو سمايل

الليزر التقليدي

الليزك التقليدي بيتم على مرحلتين …
مرحلة بيتم فيها رفع السطح الخارجي من القرنية باستخدام جهاز يسمى الميكروكيراتوم …
والمرحلة التانية هي علاج القرنية نفسها و بتتم باستخدام ليزر يسمي اكزيمر ليزر
الميكروكيراتوم هو عبارة عن أداة تشبه المشرط دقيقة و صغيرة جدا دورها انها ترفع جزء من سطح القرنية عشان تكشف عن الجسم الداخلي للقرنية اللي بيتسلط عليه الليزر اكزيمر عشان يقوم بإرسال نبضات مسئولة عن نحت الجسم الداخلي للقرنية عشان يعالج التحدب

تقدر تشوف خطوات عملية الليزر بالتفصيل من هنا

الفيمتوليزك

الفيمتوليزك بيتم هو كمان على مرحلتين و لكن تم فيه الاستغناء عن جزء الميكروكيراتوم و استبداله بليزر فيمتو ثانية عشان يقوم بعملية رفع الطبقة الخارجية من سطح القرنية و دا ليه مميزات كتير لو عايز تعرفها بالتفصيل إدخل على الإنفوجرافك دا 

الفيمتو سمايل

اما في تقنية الفيمتو سمايل تم الاستغناء عن فكر كشط الطبقة الخارجية من القرنية تماما واصبحت العملية بالكامل بتتم باستخدام الليزر فقط …

وهو دا النوع اللي احنا بنرشحه مع الفيمتوليزك لو بتفكر تعمل تصحيح إبصار بسبب دقتهم العالية و عدم تأثيرهم على قوة و تماسك القرنية و دا مش هيسببلك اي اثار جانبية فيما بعد ليها علاقة بقوة القرنية و تماسكها زي القرنية المخروطية … لو عايز تعرف خطوات العملية بالتفصيل شوف الإنفوجرافيك دا

إيه هي مميزات استخدام الليزك عموماً و الفيمتو سمايل خصوصا ؟!

مميزات الليزك بشكل عام هي تصحيح الابصار و معالجة ضعف البصر الناتج عن قصر النظر وطول النظر والاستجماتيزم …
ولكن تقنية الفيمتو سمايل هي الأفضل على الإطلاق خصوصاً لعدم اجراء فتحة كبيرة في السطح الخارجي من قرنية العين ودا يتسبب في الحفاظ على قوة و تماسك القرنية فبالتالي أي حد بيكون شغال في مجالات عمل بتعرض عينه لأي صدمات خارجية والرياضات العنيفة زي الـBoxing وغيرهم مبيكونش عندهم مشكلة من انهم يمارسوا عملهم بشكل طبيعي بعد إجراء الفيمتو سمايل بشكل سريع جداً

هل عمليات تصحيح الإبصار آمنة ؟!

نقدر نقول ان تقنية الفيمتوليزك و الفيمتو سمايل هما الأكثر اماناً .. نتيجة التطور اللي حصل فيهم والاعتماد الكلي على الليزر سواء في رفع السطح الخارجي للقرنية في الفيمتوليزك او في علاج تحدب القرنية ذاته .. وده بدوره منع تماماً وجود اي تدخل جراحي في العين ورفع معاملات الأمان وقوة والتحام القرنية بشكل كبير جداً على عكس إجراء الليزك التقليدي

إيه هي الأعراض الجانبية لعمليات تصحيح الإبصار ؟!

زي ما قولنا عملية تصحيح الإبصار عملية امنة بنسبة تقترب من 95%  و لكن قد يكون في بعض الأثار الجانبية الخفيفة المصاحبة للعملية اللي بتختفي بسرعة مع الوقت زي:-

  • حساسية العين للضوء، وخصوصاً في يوم العملية.
  • الشعور برغبة فرك العين، في الأيام الأولى للعمليّة.
  • احمرار خفيف في العين بيختفي خلال أسبوعين.
  • جفاف العين، وعشان كدا بننصح باستعمال قطرات مرطبة، لعدّة شهور من بعد إجراء العمليّة في بعض الحالات مش كلها …

هل ممكن لأي شخص إنه يعمل عملية تصحيح إبصار؟!

الإجابة أه و لكن بشروط .. الشروط دي اللي بيقدر يحددها و يتأكد من توافرها هو الطبيب المعالج من خلال الفحوصات وخلينا نشرحلكم الموضوع بيتوقف على ايه بشكل كبير…

أسباب ليها علاقه بضعف الرؤية

  1. سبب عضوي يعني بيكون عنده مشكلة مش بصرية يعني مش بتتصلح بالنظارة زي مشاكل المياه البيضاء و الشبكية
  2. سبب نظري او بصري و دا بيتصلح بالنظارة لانه بيكون خارجي و متعلق بتحدب القرنية فقط فبالتالي لو التحدب اتعالج عن طريق واحدة من عمليات تصحيح الإبصار بيقدر يشوف بشكل كويس .. هو دا اللي يقدر يعمل عملية تصحيح الإبصار و اللي يحدد نوع الإجراء هو الطبيب المعالج …

في اسباب تانية …

– زي ان القرنية تكون رقيقة بشكل كافي ميسمحش بإجراء عملية الليزك التقليدية فبيتم اللجوء لعمليه الفيمتو سمايل او الفيمتو ليزك علي حسب درجة سمك القرنية …

– زي ان يكون في طول نظر مش قصر نظر و بالتالي مينفعش يتعمل عملية الفيمتو سمايل في الحالة دي  

هل إجراء تصحيح الإبصار مؤلم ؟!

دلوقتي أكيد اتكون عندك سؤال بديهي جداً بيقول (طيب هي العملية دي مؤلمة؟) … لاننا عمالين نتكلم عن كشط في الطبقة الخارجية من القرنية لكن خلينا نقول تاني…

عملية الليزك عملية امنة تماماً … ولكن احنا بنرشحلك عملية الفيمتو سمايل و الفيمتو ليزك نظراً لعدم وجود اي تدخل جراحي فيهم … والعملية كلها بتكون قائمة على الليزر بشكل أساسي فبالتالي دقة أعلى و نسبة نجاح أعلى …
ومن أهم المميزات هي قوة التحام السطح الخارجي للقرنية بالعين مرة تانية وده ميخليهاش تتعرض بأي شكل من الأشكال بعد كده لأي زحزحة او آثار جانبية أقل …
غير الحفاظ على قوة وتماسك الغشاء الخارجي للقرنية على عكس ما ممكن يحصل في الليزك العادي

طيب برضه اللي بيعمل تصحيح ابصار بيحس بأيه اثناء العملية؟
كل اللي بتحس بيه بيكون عبارة عن تقل في العين او نقدر نقول شكة بسيطة بيكون عارفها كويس الناس اللي عينها اتطرفت قبل كده و الناس اللي بتلبس عدسات لاصقة .. فنقدر نقول ان مبيكونش في الم تماماً و ده كمان ناتج عن وضع بنج سطحي

هل إجراء عملية تصحيح الإبصار بتتعمل و أنا مستيقظ؟

عملية الليزك بتتعمل و انت صاحي لكن انت مش بتحس بأي حاجة لإن الموضوع مش مستدعي بنج كلي فبنكتفي بالبنج الموضعي من خلال قطرة طبية …و كل اللي بتحس بيه أثناء العملية هو احساس شكة بسيطة كأن رمش وقع جواها …

لكن بشكل علمي مفيش أي ضرر على الإطلاق من كونك مستيقظ ومدرك للجراحة في وقتها… فلو مثلاً حبيت تحرك عينك الليزر هيتتبع حركة عينك عشان يوصل للمكان المُستهدف لو اتحركت حركة قوية بشكل مفاجئ نتيجة العطس مثلاً فالليزر بيقف تلقائياً … فكل الحالات كونك مستيقظ مش بيأثر ولو بنسبة ضئيلة في امان عملية الليزك …

إيه اللي بيحصل قبل عملية تصحيح الإبصار؟!


قبل العملية الطبيب بيخلي المريض يعمل فحص شامل للعين لضمان صحة العينين بشكل كافي….
وبيبدأ يقيم الشكل والسمك الخاص بقرنية المريض … وبيتم تحديد مدى (قصر النظر.. طول النظر .. الاستجماتيزم).


غير ان من الحاجات المهمة اللي بيحرص عليها الطبيب هي تقييم مدي رطوبة العين …
وبينصح المريض بالعلاج الوقائي لتقليل خطر الإصابة العيون بالجفاف او الالتهابات بعد إجراء الليزك.


عادة في إجراءات الفحص بيتم استخدام جهاز معتمد علي الـ “topographer” لقياس انحناء السطح الأمامي
لقرنية العين وإنشاء “خريطة” القرنية الخاصة بك.


غير ان طبيب العيون بيهتم إنه يتابع تاريخك الصحي العام وأي أدوية تتناولها لمعرفة هل في تأثير علي المناعه بتاعتك ولا لا

إيه الحاجات اللي مفروض تعملها قبل ما تعمل تصحيح إبصار؟!

  • توقف عن ارتداء العدسات اللاصقة

    لازم تتوقف عن ارتداء العدسات اللاصقة لفترة معينة هيقولك عليها الدكتور بتاعك حسب حالتك (عادة حوالي أسبوعين) عشان القرنية بتاعتك تقدر تاخذ شكلها الطبيعي و ميكونش في اي مشاكل ناتجه عن اخطاء في الفحوصات بسبب ارتداء العدسات

  • الإلتزام بتعليمات الدكتور

     لو الطبيب كان طالب منك تلتزم بأدوية معينة فترة ما قبل الجراحة احرص عليها كويس وفي يوم الجراحة بننصحك إنك تبعدي عن أي مكياج في منطقة العين او رموش صناعية …و حاول تاكل وجبة خفيفة قبل الذهاب الى الطبيب 

كل الاحتياطات البسيطة دي هدفها تجنب آي تداخل يحصل مع العين يسبب الم او تأثير سلبي على العملية و نتائجها

نتائج اجراء الليزك ..

من فترة كان اقصى حاجة ممكن يعملها الليزك هي تحسين ضعف النظر الناتج عن خلل في 6 درجات فقط و لكن مع التطور و ظهور الفيمتوليزك و من بعده الفيمتوسمايل بقينا قادرين دلوقتي نعالج لغاية 14 درجة ضعف نظر .. لوسنك فوق الـ40 سنة ممكن بعد العملية تحتاج نظارة أثناء القراءة لو كان نظرك شديد الضعف  قبل الليزك … لو هتطلب مننا نصيحة فاحنا ننصحك بالفيمتوليزك و الفيمتو سمايل لان الليزك التقليدي على وشك انه يختفي تماماً لما له من بعض الأثار الجانبية اللي ممكن تحصل

تقدر تعرف تفاصيل أكتر عن عمليات تصحيح الإبصار للي بنقدمها بمركز فيمتوليزك الدولي سواء في أسعارها و هل هي مناسبها ليك ولا لأ من هنا

المصادر :
https://www.ncbi.nlm.nih.gov/pmc/articles/PMC3497460/
https://www.ncbi.nlm.nih.gov/pubmed/23152662
https://augenchirurgie.clinic/en/treatments/laser-eye-surgery/femto-lasik
https://www.eyeworld.org/article-smile-compared-to-lasik-and-other-procedures