مقدمة عن تاريخ الليزك

اتكلمنا في المقال اللي فات عن الليزك بشكل عام  و أنواعه و امتى بنعمله بالظبط و تقدر تقرأ المقال دا من هنا في المقال دا بقى هنتكلم عن نوع واحد بس من انواع عمليات الليزك و هو الفيمتوليزك و هنحاول نتناوله من كل الجوانب بحيث تخرج من المقال عارف ايه هو الفيمتوليزك … لكن محدش يقدر يحدد انت هتعمل اي نوع من أنواع العمليات حتى الدكتور غير بعد إجراء مجموعة من الفحوصات الشاملة للعين وبعض الفحوصات اللي متعلقة بالمناعة …  بس تقدر تقول ان هيكون عندك كم معلومات كافي جداً لمعرفة كل جوانب تقنية الفيمتو ليزك

ظهور تقنية الفيمتوليزك كان مرتبط بطبيعة التطور في العصر الحالي  

عملية الفيمتوليزك ظهرت بعد ما تم اكتشاف الليزر بفترة و تحديداً ليزر الفيمتوثانية… و اكتشاف أن ليه تطبيقات واستخدامات كتير في مجالات كتير زي الصناعة و الطب ..
حاول تاخد بالك ان في فرق كبير بين الليزر العادي و ليزر الفيمتو ثانية !

لان *ليزر الفيمتو ثانية* تردده أو قوته اعلى بكتير جداً من الليزر العادي

ما هو الليزر؟

مش عايزين ندخل في تفاصيل الموضوع الفيزيائية و لكن خلينا نقول الموضوع بشكل بسيط…
الليزر عبارة عن حزمة مجتمعة من الضوء لها صفات فيزيائية معينة من أهمها الطاقة العالية .. الطاقة العالية دي هي اللي بتخلي الليزر له استخدامات طبية ممتازة …

و لكن ليه عملية الفيمتوليزك اسمها فيمتوليزك؟ ايه جزء “الفيمتو” ده؟

سبب تسمية التقنية بالفيمتوليزك

جزء “الفيمتو” من الجملة الفيمتوليزك بيتم نسبه إلى مفهوم فيزيائي شهير و هو الفيمتوثانية اللي استطاع الدكتور احمد زويل من خلاله أنه يخترع تقنية لها القدرة على تصوير التفاعلات الكيمائية و حركة الجزيئات في مدة أقل من الثانية (فيمتو ثانية)..
الفيمتو ثانية عبارة عن جزء من المليون مليار من الثانية .. والفرق ما بين الفيمتو ثانية و الثانية زي الفرق بين الثانية و الـ32 مليون سنة !! متخيل قد ايه هو زمن صغير جداً؟

طيب و ايه علاقة دا بكلامنا في المقال دا عن الفيمتوليزك؟
العلاقة ان تقنية الفيمتوليزك في منتهى الدقة لأنها بتستخدم اشعة ليزر من نوع فيمتو ليزر و دا بيرفع معدلات أمان و معدلات نجاح العملية بشكل كبير جدا و بيميزها عن تقنيه الليزك التقليدي

دور الليزر في الطب

الليزر مش بيستخدم بس في طب العيون وعمليات الليزك لكنه بيستخدم في مجالات طبية كتير زي طب الاسنان وفى الجراحات الدقيقة لكن أثره في طب العيون و تصحيح عيوب الإبصار كبير جداً لإن قرنية العين غشاء رقيق جداً يتطلب التعامل معاها بحذر كبير.

ما هي الحالات التي تناسبها عملية الفيمتوليزك؟

ماحدش يقدر يقول ان الفيمتوليزك بيناسب نوع معين من الناس و مش بيناسب النوع التانى …  

لكن  نظرا لدقة الفيمتوليزك و قدرته على عمل الشريحة بشكل أدق وأرفع من اللي بيعملها المشرط الجراحي … وده بيخليه قادر على تصحيح درجات نظر أضعف من الليزك التقليدي … ويخلينا نقدر نشتغل علي قرنيات سمكها أقل مقارنة بالليزك التقليدي.


و عشان ميحصلش تداخل في دماغك بين الفيمتو ليزك و الفيمتو سمايل فخلينا نقول ان التقنيتين مناسبين للحالة دي و لكن الفيمتو سمايل مناسب اكتر في بعض الحالات و لو عايز تعرف ليه ممكن تقرأ عنه من هنا

مميزات الفيمتوليزك

استخدام الفيمتوليزر في عملية الفيمتوليزك لتصحيح انواع ضعف الإبصار المختلفة له مميزات كتير جداً لكن اللي مهم تعرفها …

  • رفع طبقة القرنية الخارجية

    استخدامه في رفع طبقة القرنية الخارجية بيخليها تتشال بطريقة مستوية تماما بحيث يكون مفيش اي جانب فيها اكبر من التاني على عكس الليزك التقليدي …

  • استواء سطح القرنية

    استواء سطح القرنية بيخلي من الصعب ان الإنسان يصاب بالاستجماتيزم نتيجة عدم تكون أكثر من زاوية لسطح القرنية بيمر الضوء من خلالها .. فبالتالي مبيحصلش أي تشوش في الرؤية

  • قوة التحام سطح القرنية بالقرنية

    قوة التحام سطح القرنية بالقرنية بعد العملية بتكون اقوى من قوة الالتحام الموجودة بعد عملية الليزك التقليدي فبالتالي بيكون صعب جدا ان الشخص يحصله تحرك او خلخلة في الطبقة الخارجية من القرنية ..

ما هي شروط إجراء عملية تصحيح النظر بـ الفيمتو ليزك؟

عملية الفيمتوليزك عملية امنة تماما و سهلة … والشفاء منها بيكون سريع و لكن في بعض الشروط المفروض تاخد بالك منها …

 

ان المريض يكون تم 18 عام لان قبل كده بيكون نظر الإنسان متغير من حيث الشدة و الضعف
فلازم يكون النظر مستقر تماما و معروف قبل العملية

 

لازم تبلغ الدكتور المعالج ليك بأي مرض مزمن موجود عندك اذا كان موجود و خصوصاً لو كان مرض ليه علاقة بالمناعة

 

لازم الدكتور المعالج يطلع على كل التاريخ المرضي الخاص بيك و يتأكد اذا كان في اي امراض مناعية
.. وهل بتاخد ليه الادوية المناسبة ولا لا؟

هي مش عملية خطيرة و لكن هي بتتعمل في عضو من أهم أعضاء الجسم و عشان كدا لازم يكون في شفافية بينك و بين الدكتور بتاعك

أشخاص يحظر عليهم عملية تصحيح النظر بـ الفيمتو ليزك؟

  • السيدات الحوامل

    لإن اثناء فترة الحمل بيحصل تغيرات في الهرمونات و اللي بينتج عنها بالتبعية تغيرات في قوة الإبصار … علشان كده من الأفضل انك لو قررتي تعملي فيمتوليزك يكون بعد الحمل بحوالي شهرين … او حسب ما الدكتور المعالج ليكي يقولك

  • الأشخاص المصابون بفيروس الهربس

    • فيروس الهربس عبارة عن فيروس بيدخل الجسم و بيسبب في المناطق اللي دخل منها التهابات بالجلد و من المناطق اللي بتتأثر بيه هي مناطق الجلد المحيط بالعين

    *توضيح* اذا كانت اصابة فيروس الهربس في الجلد وفي مناطق بعيدة عن العين … ممكن العملية تتم بشكل طبيعي جداً

  • المصابون بالجلوكوما او المياه الزرقاء

    الجلوكوما هي عبارة عن كذا مرض في العصب البصري و بيسببوا تلفه بشكل كامل … ودي حاجة بتفقد صاحبها الرؤية …
    ويعتبر الفيمتوليزك او الليزك في الحالة دي ملهوش اي تأثير لأننا زي ما قولنا دول بيتعملوا في قرنية العين السليمة …

    *لكن* في بعض الحالات اللي مبيكونش فيها العصب البصري تعرض لتلف كامل ممكن عملية تصحيح الابصار تتم عن طريق تقنية مختلفة زي الليزر السطحي او الـPRK … واللي بيخلينا نلجأ ليه في الحالات دي انه بيكون اكثر امانا على العصب البصري من أي تقنية اخرى

طيب احنا دلوقتي عرفنا كل حاجة عن الفيمتوليزك من أول سبب التسمية لغاية العملية و نجاحها … ايه اللي المفروض تعمله بعد كده وتتعامل مع عينك ازاى؟

احساس ما بعد عملية تصحيح النظر بـ الفيمتو ليزك؟

بعد العملية هتحس بزغللة في العين … او ان عينك تقيلة شوية … او هتحس ان في حرقان بسيط كأنك فاتح عينك في حمام سباحة … ومش بعيد تحس ان في عدسة محطوطة على عينك … متقلقش ده احساس طبيعي و هيروح مع الوقت و في الغالب بيروح بعد ساعتين أو ثلاثة من العملية

نصائح بعد عملية تصحيح النظر بـ الفيمتو ليزك؟

تحسن النظر بعد عملية الفيمتوليزك بياخد حوالي 3 ساعات تقريباً و لكن عشان توصل لأحسن نتائج ممكنة دا بيكون خلال 3 أسابيع من العملية …

دي بعض النصائح اللي المفروض تكون حريص عليها لعدم تعرضك لأي آثار جانبية…

  • ابعد تماما عن اي رياضات عنيفة زي الـ boxing خلال شهر من بعد العملية
  • حاول تتجنب نزول حمام السباحة لمدة شهر تقريباً
  • تجنب التعرض لدرجات حرارة عالية زي الموجودة في السونا
  • لو حسيت بأي مشكلة توجه لطبيبك فوراً

 

ما هي النتائج النهائية لعملية تصحيح النظر بـ الفيمتو ليزك؟

هاتخلصك من النظارة ☺

تقدر تعرف تفاصيل عملية الفيمتوليزك و أسعارها و هل هي مناسبة ليك ولا لأ من هنا